Saturday, November 8, 2014

الهروب الكبير لعصابة الطراطير


رمل..سما زرقا..هوا نضيف
و شاليهات بيضا من غير تكييف
مارينا دي يا جيمي و الا دي شرم ؟
لا يا لولو دة سجنك يا خفيف
.......
انكل زيكو أهو هناك ماشي
هو معانا و الا زيارة و ماشي؟
ماتنادي يا جيمي ياللا عليه
و اسأله بابا ليه لسة ماجاشي؟
.......
أهلا يا ولاد نورتونا
انا قلت.. مستحيل تسيبونا
تعالوا بينا بقى عالكانتين
بيقولوا جابوا فيه بيبسي و تونة
.......
صفوت باشا...صباح الفل
معايا مفاجأة.. تعال و طل
بس أمانة يا شيخ ما تزغرد
دة أوحش حاجة شماتة في الذل
.......
يا مرحب بولاد الغالي
تعالوا جنبي و عز على شمالي
احكوا لي يا شباب حصل إيه
و اجري يا جابري نادي لي على والي
.......
والي و فايد مع سليمان
و رمزي و شاعر و عبروحمان
و رسومات و مباني و سراديب
و الظاهر حيهربوا همة كمان
.......
وطي صوتك يا حمار يا فاضحنا
انت عايزهم يلغوا في تصاريحنا ؟
موضوع هروبنا دة أكبر سر
و لا نقوله و لا حتى لروحنا
.......
هروب إيه ؟..انا مش فاهم حاجة !
هو برة باقيلنا يا عالم حاجة ؟
ما تخلونا هنا قاعدين
و انا اجيبلكو دش و تلاجة
.......
إيه يا لولو ما تفوق يا أخينا
انت فاكرنا في جنوب سينا ؟
ناقص تطلب ساونا و تدليك
و كمان مزة تروق فينا
.......
أهلا أهلا بيك يا حبيب
روح يا مجاور.. هات مشاريب
راح نبدي العملية اليلة
و زنازيننا من الليلة حنسيب
.......
أول حاجة انس يعملها
حفلات رقص تصحي في ليلها
لجل ما نلهي الناس عنينا
و الحراس يتهد في حيلها
.......
رأيي كمان .. نحلق لسرور
لا ماسورة نافعة معاه و لا سور
و لو مسكوه حنروح في ابو نكلة
وحيفوتنا اتوبيس الواد غبور
.......
كلامك فل يا عم حبيب
و جرانة و الشيخ انا راح أجيب
حاكم الحفلات دي ليها ناسها
و الناس دي اساتذة تغييب
.......
اطفوا النور .. يا جمال خبيني
بيقولوا مسكوا في الشربيني
و معاه الخطة و كل حاجاتنا
و الجيش في الويل حيوريني
.......
خطة إيه يا عمو نظيف؟
و هروب إيه؟ما كفاية يا سخيف
دة انت السور من طولك ضج
انك كاشفه شتا أو صيف
.......
انا عارف و الله يا جمال
بس انا راجل عندي عيال
و المزة اللي انا لسة واخدها
وحشتني و انا ليها ميال
.......
بقى بالذمة دة حال يرضيك ؟
المغربي توي صارفله الشيك
بخمسين ألف شاليه في مارينا
لجل المزة ما تشبع ***
.......
انتبـــاه منك ليه يا أخينا
ادي كبيركم جه وسطينا
و لا مستشفى حتنفعه تاني
و عيشته حتبقى غم و طينة
.......
كدة بقى حنسك على الخطة
ولا فيه حتى حلاوة بالشطة
ماهو اللي حنهرب و قلنا حيحمينا
جاي و معاه قبقابه في شنطة
.......