Distance to Empty 63 km
و بما إن اليوم كان مش أحسن حاجة، بصيت بكل لامبالاة للمبة و كملت سواقة عادي و أنا بأقول لنفسي "مش مشكلة، بكرة أبقى أنزل بدري شوية و أمون من أي ⛽ في السكة
و فعلاً قمت النهاردة بدري شوية ⏰ و نزلت ربع ساعة بدري عن ميعادي و ركبت 🚘 و شغلت 🎼🎶 الظريفة بتاعة أول اليوم قبل ما يقفل على صباعي كالعادة!
مفيش 1⃣0⃣ دقايق و حسيت ان حد ضربني بالقلم على وشي لما افتكرت اني نسيت الفلوس في البيت و ان المحفظة مفيهاش غير 20 جنيه و 💳 و الرقم القومي 😱
و طبعاً اللي ساكنين في الهرم زي حالاتي عارفين إن كل البنزينات عندنا بقت "توتال" و دول مابيستخدموش غير كروت توتال مسبقة الشحن أو كاش بس
بصيت عالشارع بسرعة و اكتشفت ان كل البنوك فاتت خلاص و مش باقي غير 🏧 بتاعة الأهلي المصري و التجاري الدولي اللي في أولاد رجب في أول فيصل ..
المشكلة بقى ان الحتة دي فيها على طول ونش المرور عشان مطلع الكوبري و 🛂 ما بيرحمش و شغال كلبشة
قررت أجازف، و عملت عبيط و ركنت جنب الونش ذات نفسه و ضحكت ضحكة بلهاء 😁 لسيادة الصول المبجل و أنا بأقول له "ثواني يا باشا بس أسحب قرشين" .. و هو من المفاجأة ما نطقش!
جريت بسرعة على الماكينة، حطيت الكارت و فعلا سمعت اصوات كتيرة جوة الماكينة، بس في الآخر رمت الكارت في وشي مع رسالة رقيقة بتقول "شكراً لاستخدام خدماتنا" .. !
رحت بسرعة الناحية التانية للماكينة بتاعة سي آي بي لقيت مكتوب عليها اعتذار رقيق برضه بيقول "عفواً .. هذه الماكينة خارج الخدمة" ..
كل الوقت دة طبعاً كان سبب في ان الباشا الصول يفوق من صدمته و يبتدي يصب لعناته على اليوم اللي شافنيي فيه.. و بما اننا في دولة القانون، اضطريت أدفع العشرين جنيه الوحيدة اللي في جيبي عشان أحصل على البركة من جديد و أتجنب الكلبشة أو الغرامة.
كدة مابقاش فيه حل غير اني أدخل المنيل عشان ألاقي بنوك اعرف أسحب منها، و فعلاً أخدت كوبري عباس زي الشاطر و دخلت منيل الروضة عشان أروح بنك الإمارات دبي او بنك إسكندرية اللي في ميدان المماليك
ركنت العربية غلط طبعاً قدام مدخل جراج عمارة و جريت بسرعة 🏃 اسحب الفلوس و انا مطنش صويت مرات البواب بتاع العمارة 🤕
دخلت الكارت، و الحمد لله الماكينة المرة دي جبرت بخاطري و طلعت فلوس 👏👏👏
رجعت العربية طبعاً و أنا كلي فخر بالإنجاز العظيم دة، و عملت نفسي مش شايف مرات البواب، و ركبت العربية و رجعت برة تاني شارع المنيل، و نزلت نفق الملك الصالح و دخلت اول صلاح سالم، و قلبي هفهف 😍 أول ما شفت لوجو بنزينة موبيل اللي عند سور مجرى العيون
دخلت البنزينة و لقيتها فاضية
بس كمان لقيت حاجة غريبة جداً
يافطة مكتوب عليها:
عزيزي العميل.. يوجد دفع بالفيزا
😠
