ايوة يا سيدي ..
أنا من العيال اللي كانت عندها 13 سنة بس سنة 1986 و معندهاش نت و معندهاش موبايل و معندهاش دش بس كانت بتسمع آخر تحديث للبوب تشارت على راديو مونت كارلو و برنامج الشارع الغربي على إذاعة الشرق الأوسط أول ما يرجع من المدرسة و بتشتري الالبوم اللي بتختار أغانيه مخصوص من محل المزيكا اللي في شارع مصدق أو تضرب مشوار من الهرم لغاية آخر مدينة نصر قبل ما يبقى فيه كوبري اكتوبر عشان يشتروا ألبوم بت شوب بويز و مادونا و ألفا فيل و مايكل جاكسون ..
انا اللي كنت باسمع محمد منير في الوقت اللي كان الناس بتسمع فيه عدوية و وردة و فايزة أحمد و اشتريت ألبوم أنوشكا سنة 89 بدل ألبوم فارس و المزداوية و ألبوم علاء عبد الخالق و الناس افتكرتني مجنون !
انا اللي عارف معلومات كتير حضرتك ماتعرفهاش مع انك عندك كل حاجة تساعدك انك تعرف لأنك ببساطة مش عايز تعرف و مكتفي باللي بيتقال لك و بتصدقه و خلاص و بناءاً عليه بتبني مواقفك مع أو ضد بلدك .. !
أنا اللي من الجيل اللي كان بينزل المنيل عشان ينسخ فايلات على سي دي عشان ماكانش فيه في مصر سي دي رايترز و كان أصحابي بيحقدوا عليا عشان عندي كمبيوتر آي بي إم اوريجينال مساحة الهارد ديسك بتاعه 350 ميجا "أيوة ميجا مش جيجا" 😄
أنا من الجيل اللي سافر مع أهله برة و قعد يتشتم و يتضرب كل يوم و هو عنده 12 سنة بس من عيال فلسطينيين و سوريين لمجرد أن بلده انتصرت في الحرب و عملت معاهدة سلام مع إسرائيل اعتبروها همة خيانة !
أنا اللي شفت النقلة من التليفون اللي بقرص للتليفون الديجيتال لتليفون العربية للبانانا للموتورولا للنوكيا للسامسونج للايفون ..
أنا اللي شفت الاتحاد السوفييتي و شفت سور برلين و هو بيقع و شفت منتخب المانيا الشرقية و منتخب يوغوسلافيا
انا اللي سهرت اتفرج على ستيف اوستن و جيمي سامرز في اخترنا لك يوم الاربع و كنت باتفرج على نادي السينما يوم السبت و أوسكار يوم الخميس و كنت باتفرج على الفيديو هيتس مع حمدية حمدي يوم الأحد في العالم يغني .. !
انا اللي انت شايف اني "قديم" لمجرد انك عارف شوية اغاني مهرجانات أنا شايف انها مجرد إهدار لكل قيم الذوق و الفن .. !
المجد لمواليد السبعينيات
No comments:
Post a Comment